Llefydd Awyr Agored
Os ydych yn mwynhau’r awyr agored, y cyfan sydd raid i chi ei wneud yw camu allan drwy’ch drws ffrynt a dechrau ymarfer. 
Yn gyfoeth o fynyddoedd gwyllt, bryniau hardd, parciau perffaith, caeau eang a thraethau bendigedig, mae gan Gymru ddigon i’w gynnig i’r rhai sydd eisiau bod yn egnïol yn yr awyr agored yn y wlad hon, gan fwynhau wrth deimlo’r haul ar eich croen a chael digon o awyr iach.
Mae pobl o bob oed a gallu’n cael cyfle i feithrin agwedd o gymryd rhan am oes tuag at iechyd a ffitrwydd drwy gamu allan ar garreg eu drws a mwynhau’r amgylchedd naturiol o’u cwmpas.
A cheir llu o resymau dros fynd allan i ymarfer...
Mae’n rhad ac am ddim! Mae cerdded, rhedeg, beicio, nofio, dringo a hyd yn oed ioga a t'ai chi wedi’u creu’n wreiddiol i’w perfformio y tu allan heb fawr ddim offer ac, o’r herwydd, nid ydynt yn costio llawer.
Mae’n iach Beth am loncian, beicio ac ymarfer y corff yn y parc yn hytrach nag yn y gym a chael llond ysgyfaint o awyr iach a chyflenwad da o fitamin D. Mae fitamin D yn helpu eich corff i gludo ocsigen yn effeithiol ac mae hynny’n bwysig wrth ymarfer, gan ei fod yn annog eich cyhyrau i weithio’n well.
Wrth ymarfer y tu allan, rydym yn gorfod goresgyn disgyrchiant, grymoedd adweithiol y ddaear a ffactorau amgylcheddol fel gwynt, gwres ac oerni, yn ogystal â newid mewn tirwedd. Oherwydd y newidiadau diddiwedd hyn a wynebir gan ein corff, mae’n rhaid iddo ddefnyddio mwy o gyhyrau na sydd angen wrth gymharu ag ymarfer y tu mewn yn y gym ac, o ganlyniad, defnyddir mwy o galorïau.
Felly beth am dynnu llwch oddi ar eich beic a mynd am dro o amgylch eich pentref neu gael hyd i lwybrau difyr yn y parciau yn eich ardal. Hefyd, gallwch gerdded, rhedeg, sglefrolio neu ddringo. Fe all y rhai sy’n hoff o ddwr ddewis rhoi cynnig ar ganwio, rhwyfo, nofio neu gaiacio yn y llu o ganolfannau gweithgarwch awyr agored a geir ledled Cymru.
Yn lle mynd am yr un dro o amgylch y parc lleol, beth am gynnwys teithiau cerdded hirach ar hyd llwybrau natur neu arfordiroedd, sy’n cynnwys dringo i fyny elltydd a llethrau serth, trwy goedwigoedd a thros dwyni tywod i ychwanegu amrywiaeth at eich ymarfer.
Gyda’i thir agored eang a’i mynyddoedd ysgithrog, ceir cyfleoedd diddiwedd yn yr awyr agored yng Nghymru i ymarfer.
Cerdded:
Mae cefn gwlad Cymru’n llawn rhwydwaith o lwybrau troed a thraciau ac mae’r opsiynau’n ddiddiwedd. Bydd cerdded yn rheolaidd ac yn gyflym yn gwella lefel eich ffitrwydd corfforol a hefyd yn eich gwneud yn fwy effro yn feddyliol, ac yn hapusach yn emosiynol. Gallwch gerdded o le i le gyda’ch bag ar eich cefn, neu aros mewn pentref am wythnos neu fwy, gan fwynhau’r ardal o amgylch drwy fynd ar deithiau cerdded dyddiol.
