Mae aelodau clwb colli pwysau ym Mae Cinmel yn cynnal eu pwysau mewn mwy nag un ffordd, gyda sesiynau ymarfer mewn cadair, diolch i gyllid y Loteri Genedlaethol gan Gyngor Chwaraeon Cymru.

Mae Clwb Heini Cymunedol Bae Cinmel wedi bod yn cynnal wyth o sesiynau awr yr wythnos ar gyfer eu 54 o aelodau ers mis Ionawr 2007. Wedi’i enwi fel un o’r grwpiau colli pwysau mwyaf llwyddiannus yng Nghymru, mae’r clwb yn bwriadu adeiladu ar ei lwyddiant, diolch i gyllid y Loteri Genedlaethol a gyflwynwyd drwy gyfrwng menter Cist Gymunedol Cyngor Chwaraeon Cymru.

Bydd y grant o £300 yn talu am hyfforddwr i gyflwyno sesiynau blasu 12 wythnos ar gyfer ymarfer mewn cadair. Os bydd y dosbarthiadau’n profi’n boblogaidd, bydd y Clwb Heini’n parhau â dosbarthiadau drwy gyfrwng eu cynllun talebau gweithgarwch. Mae’r clwb wedi datgan bod ymarfer mewn cadair yn flaenoriaeth uchel iddo er mwyn helpu trawsdoriad o’r aelodau, a fyddai’n elwa o ffurf ysgafnach ar ymarfer oherwydd oedran, pwysau neu anabledd.

Mae i ymarferion mewn cadair fanteision penodol fel dull ymarfer. Mae’n sefydlogi gwaelod asgwrn y cefn gan ddarparu sylfaen gadarn, gwell amrediad o symudiad drwy ddarparu pwyntiau i symud a chefnogi a lleihau’r problemau gyda chynnal llwyth a chadw cydbwysedd i’r rhai gyda symudoledd gwan a phoen yn y cymalau.

Meddai Jacqui Richmond, cydlynydd y Clwb Heini, "Byddai dosbarthiadau ymarfer mewn cadair yn galluogi i’r aelodau na fyddent yn gallu manteisio ar y Cynllun Talebau cyfredol i fod yn fwy egnïol wrth iddynt fynd ati i golli pwysau. Mae’n bwysig bod pob aelod o’r grŵp yn cael cyfle cyfartal i gymryd rhan mewn gweithgareddau."

Ers sefydlu cynllun Cist Gymunedol Cyngor Chwaraeon Cymru yn 1999, mae cymunedau ar hyd a lled Cymru wedi bod yn buddsoddi’n helaeth mewn prosiectau chwaraeon a gweithgarwch corfforol.

Meddai Cadeirydd Cyngor Chwaraeon Cymru, Philip Carling:

"Mae’r Gist Gymunedol wedi bod, ac mae’n parhau i fod, yn llwyddiant ysgubol ac mae’n hynod boblogaidd ledled Conwy. Bydd cynyddu’r cyllid ac ehangu sgôp y cynllun yn cynyddu ei effeithiolrwydd.

"Panelau wedi’u lleoli ym mhob un o’r 22 awdurdod lleol yng Nghymru sydd yng ngofal yr arian ac mae ganddynt awdurdod dirprwyol i ddyfarnu grantiau i brosiectau gwerth chweil. Rydym eisiau clywed am syniadau a phrosiectau gwreiddiol a fydd yn cael mwy o bobl Conwy i fod yn fwy egnïol yn amlach."

O ganlyniad i boblogrwydd a llwyddiant diamheuol y cynllun, mae Cyngor Chwaraeon Cymru’n cynyddu lefel y grant. Bellach, gall y sefydliadau sy’n awyddus i ddatblygu chwaraeon a gweithgarwch corfforol yng Nghymru dderbyn hyd at £1000 ar gyfer prosiect cymwys dros gyfnod o 12 mis.

Mae sgôp y cynllun wedi ehangu hefyd. Yn draddodiadol, dyfarnwyd grantiau i glybiau a chyrff chwaraeon. Nawr, bydd y rhan fwyaf o sefydliadau sydd eisiau datblygu prosiectau gweithgarwch corfforol a chwaraeon yn gymwys am ddyfarniad.

Yn ddiweddar, mae’r Gist Gymunedol wedi bod yn treiddio i feysydd gwaith ychwanegol, fel y sector gwirfoddol (e.e. Clybiau Ieuenctid Gwirfoddol, Sefydliad y Merched) a’r gweithle, yn ogystal â pharhau i gefnogi prosiectau ym maes iechyd ac addysg. Felly tra bydd cyllido’r clwb pêl droed lleol yn cael aelodau ieuengaf y gymuned i gymryd rhan efallai, fe all cefnogi grŵp cerdded annog mwy o oedolion i fod yn egnïol.